أتلانتس

ياسلام بقى لو مع بداية السنة الجديدة ، يطلعلى الجنى السحرى بتاع المصباح ، وبعد ما اتخض منه شوية ، واسأله السؤال الغبى اللى معروف إجابته ، "إنت مين؟"

فيرد برخامة منقطعة النظير "منتا عارف ياعم ، شبيك لبيك والحوار ده ، انجز .. ليك ألف أمنية أحققهملك"، وطبعاً أتفاجأ بموضوع الألف أمنية دول ، "هما مش كانوا تلاتة بس؟"، فيبصلى بصة رجل المبيعات الناجح ويقولى "يا افندم ده عرض بمناسبة السنة الجديدة ، وعلى فكرة لو معجبكش أمنية فيهم ، أو حسيت إن فيهم عيب ممكن ترجعهم ، و أمنياتنا معاهم ضمان ..." ، "خلاص خلاص ياعم أقتنعت ، هشترى ... قصدى هتمنى .."

أول حاجة أتمنى إن الناس تحب بعضها ، ويبطلوا يتخانقوا لأتفه الأسباب ، وإن اللى فيه غل وحقد على حد ، يخرجه أوام أوام ، ويبدأ صفحة جديدة .

بتمنى إن كل الشباب اللى عاوز يتجوز ، يتجوز ويلاقى شقق رخيصة فى أماكن كويسة ، ويختاروا المكان اللى يعجبهم ، ويعقلوا ويبعدوا عن زحمة المدن ودوشتها.

بتمنى إن الأسعار ترخص ، والناس الفقيرة تلاقى أكل ولبس وعلاج ، وميخرجش من وسطهم ناس حاقدة على الأغنيا عشان مش حاسسين بيهم ولا بمشاكلهم.

بتمنى ، قال ايه ، اللهم اجعله خير ، مصر لابسه أخضر فى أخضر ، والصحرا مزروعة ، والفلاحين يرجعوا تانى يشتغلوا زى زمان ، والناس تاكل أكل مصرى ، ومتحتجش لاستيراد التفاح من الصين.

أتمنى أشوف فى التلفزيون مذيعين همهم يفيدوا المواطن ، ويخلصوا النية عشان يسعدوه ، مش مجرد إنهم يعملوا المستحيل عشان يشدوا انتباهه بحاجات تافهة فتزيد نسب المشاهدة ، ويزيد العائد من الإعلانات على القناة ، وطبعاً يزيد مرتب المذيع.

بتمنى أشوف أفلام ومسلسلات هدفها نبيل ، وعاوزة تطور من الشباب ، وتنشر الفضيلة ومعانى النجاح والإنجاز ، وبتنمى عقول وقدرات الناس ، وبعيدة عن قصص الحب وسنينها.

بتمنى أشوف شوارع القاهرة فاضية ، وأنزل الاوتوستراد أو شارع جامعة الدول ، فألاقى كام عربية بس هما اللى ماشيين ، وبيقولوا "ايه ده ، ده الاحساس بالوحدة فى الشوارع المصرية فظيع ، مفيش شوية عربيات كده تسلينا واحنا ماشيين ، امال فين الكلاكسات اللى كانت بتزعجنا ، وفين العربيات اللى كانت بتكسر علينا ، والناس اللى بننزل نتخانق معاهم ، معقول كده نروح أشغالنا فى موعيدنا مظبوط من غير تأخير ، ولا خصم من المرتب ، معقول فى رمضان نروح نفطر عند حد فى معاد الفطار ؟ ، وفين الميكروباصات اللى كانت بتعمل مهرجان فى الشارع ؟ .. ، وايه ده كمان ، كوبرى 6 أكتوبر مفهوش ولا عربية عطلانة ، ..... "

بتمنى أشوف أتوبيس بيقف للركاب ، ومش بيعذبهم باللعبة الشهيرة اللى السوائقين بيحبوا يلعبوها ، واللى اسمها أنا (هجرى وأنت تجرى ورايا ، ونشوف هتعرف تمسكنى ولا لأ) ، وطبعاً أنا بعذر السواق اللى بيعمل كده ، لإنه غلبان الصراحة وطول اليوم دايخ فى الزحمة ، لازم يتسلى ويلعب شوية مع الركاب ، وكفاية إنه بيرسم ابتسامة عريضة على وجه الراكب اللى بينجح فى (قفش) الأتوبيس قبل ما يهرب.

بتمنى أشوف راكب نازل من تاكسى من غير خناقة مع السواق ، ومن غير ما الشارع يتلم ويتفرج ، وإن يرجع العداد القديم زى ما حصل فى التاكسيات الجديدة عشان كل الأطراف ترتاح.

بتمنى أشوف المدارس ، فيها مناهج تفيد وتنمى قدرات التلميذ ، مش بتعلمه الحفظ ، و(قلب) اللى حفظه فى الامتحان ، وتعيّشه حياته شوية ، ومتحرموش من حصص الألعاب ، عشان ميحسش بالكبت من صغره.

أتمنى أشوف كليات مصر المحروسة مليانة طلبة بيحبوا اللى بيدرسوه ، وبيستمتعوا بالمحاضرات ، ومش بيتخانقوا على آخر المدرج عشان يناموا ويهربوا من مللها.

بتمنى يرجع العلماء الأفذاذ بتوع مصر ، اللى ماليين الغرب تطور وتكنولوجيا ، واحنا مش دريانيين بيهم ، يرجعوا يفيدوا البلد ويصلحوها ، والناس ترحب بيهم .

بتمنى تبقى قدوة الشباب أشخاص غير لعيبة الكورة والممثلين والمغنيين ، وإنّ يظهر شخصيات قوية تاخد بايد الشباب التايه لطريق يلاقى فيه الانجاز والسعادة.

بتمنى أشوف الأشخاص المجتهدين هما اللى واخدين المكانة والفلوس ، مش شاب ملوش فى أى حاجة ، وممكن يكون مش متعلم أصلاً ، يجمعله فرقة ، وأهم حاجة مينساش يعمل تسريحة فى شعره تجنن الشباب ، ويلبس الحتة الزفرة ،... واااااو ، ملوش حل ، والشباب يمشوا وراه ويسقفوله ، ويبقى مليونير فى يومين.

بتمنى إن الناس فى مصر الطيبة يبطّلوا يمشوا ورا قلوبهم وعواطفهم ، وياخدوا الأمور ويوزنوها بميزان العقل ، ومش كل كلمة فى جورنان أو برنامج يصدقوها ، ويعرفوا يفرقوا بين الحقانى والضلالى بتاع المصالح.